Вось і настала цудоўная святочная ноч Божага Нараджэння. Пасля вячэры і малітвы ў сямейным коле вернікі нашай парафіі накіраваліся на ўрачыстую Імшу Пастэрку.
Пастэрка ― гэта Імша на Божае Нараджэнне, назва якой паходзіць ад лацінскага слова «pastor», што азначае «пастух». Менавіта пастухі былі першымі людзьмі, якія прывіталі нованароджанага Збаўцу. Такая Імша адбываецца апоўначы.
Пастэрка ў нашай парафіі распачалася працэсіяй, у якой пробашч парафіі кс. Станіслаў Мжыглуд урачыста ўнёс у святыню фігурку Дзіцяці Езуса. Затым прагучаў тэкст пра гісторыю збаўлення габррэйскага народу і прадказанне прыйсця Місіі.
У гаміліі ксёндз Станіслаў заахвоціў прысутных знаходзіць час для Бога ў малітве, адарацыі і разважанні. А таксама нагадаў, што ўрачыстасць Божага Нараджэння ― гэта пра любоў да Бога і бліжняга.
Тэкст Святлана Жылевіч
Фота Ірыны Гайдамовіч
Санктуарый Маці Божай Валадаркі Азёраў 