1 лістапада Каталіцкі Касцёл адзначае ўрачыстасць Усіх святых. Падчас святой Імшы ўдзень ксёндз Станіслаў заахвоціў паразважаць вернікаў над тым, што яны робяць для таго, каб быць святымі.


У гаміліі святар распавёў пра жыццё і адносіны з Богам некаторых святых. Ксёндз Станіслаў адзначыў, што так можна было б працягваць вельмі доўга, святых многа і ўсе яны вельмі розныя: святымі становяцца дзеці і дарослыя, бедныя і багатыя, вучоныя і неадукаваныя людзі.

«Але калі жылі на свеце, яны ўсе вандравалі тымі дарогамі благаслаўленняў, якія апісаны ў сённяшнім урыўку з Евангелля, − падсумаваў пробашч. – Усе яны кіраваліся прынцыпамі, змешчанымі ў нагорнай пропаведзі Хрыста. Нельга крыху жыць Евангеллем. Святыя былі такімі ж людзьмі, як мы. І сёння нашым абавязкам з’яўляецца святасць».

«Не трэба думаць, што для святасці неабходна здзяйсняць гераічныя ўчынкі. Святасць – гэта любоў у штодзённым праяўленні. Гэта недаспаныя ночы маці; гэта клопат бацькі; гэта добразычлівая ўсмешка для свайго суседа; дабро для тых, каго сустракаем; устрыманне сябе ад словаў, якія могуць абразіць іншых; гэта павага да людзей, якіх сустракаем на працы; гэта сумленная выкананне працы і іншыя штодзённыя абавязкі. Гэта ўсё нашае жыццё», − падкрэсліў ксёндз Станіслаў.


Святлана Жылевіч