18 кастрычніка Каталіцкі Касцёл узгадвае святога Луку. У нашай парафіі імя святога носіць капліца ў бальніцы, бо святы лічыцца апекуном медработнікаў. У гэты дзень тут адбылася адпустовая святая Імша.


«Святы Лука, асаблівы апякун сённяшняга дня, у сваім зямным жыцці быў лекарам, і таму вельмі часта касцёлы і капліцы, асаблівым чынам звязаныя з хворымі і медыцынскімі работнікамі, называюць у яго гонар. Аднак святы Лука – гэта таксама евангеліст, ён з’яўляецца аўтарам трэцяга Евангелля і Дзеяў Апосталаў», − распачаў гамілію кс. Адам Квяткоўскі і распавёў прысутным гісторыю жыцця і апостальства святога Лукі.

«Няхай святы Лука дапаможа адкрыць праўду аб тым, што мы з'яўляемся вучнямі Хрыста, якія павінны слухаць свайго настаўніка і прыносіць спакой у жыццё іншага чалавека», − дадаў святар.

«Памяшканне капліцы святога Лукі ў браслаўскай раённай бальніцы невялікае, таму на нядзельнай святой Імшы яе дзверы заўсёды расчыненыя, і вернікі з калідора маюць магчымасць таксама ўдзельнічаць у малітве. У калідоры знарок для гэтага расстаўляюцца крэслы, бо калі ўсіх жадаючых капліца не змяшчае, то трэба ж неяк даваць гэтаму рады, і цудоўнае выйсце знойдзена... Споведзь таксама адбываецца на калідоры, адно што крыху воддаль. Нябесным апекуном капліцы з’яўляецца апостал Лука, які ў свой час таксама лячыў людзей, а цяпер вось ужо шмат стагоддзяў падтрымлівае хворых і лекараў з нябеснай вышыні», − так калісьці пра капліцу ў браслаўскай бальніцы пісаў часопіс «Ave Maria».

Так ёсць і цяпер. Гэта вялікі Божы дар, што ў нашай бальніцы ёсць месца, дзе чалавек можа пабыць у цішыні і паразмаўляць з Богам.


Падрыхтавала Святлана Жылевіч
Фота: Ірына Гайдамовіч