1 кастрычніка Каталіцкі Касцёл узгадвае святую Тэрэзу ад Дзіцятка Езус. У гэты дзень сваю парафіяльную ўрачыстасць перажываюць вернікі Урбан, якімі з гэтага года зноў апякуюцца айцы сальватарыяне.


У гэты дзень памаліцца з парафіянамі прыехалі таксама вернікі Браслава. Святую Імшу ўзначаліў кс. Ян Кароткін, які паходзіць з Урбан. А напачатку літургіі прысутных прывітаў пробашч парафіі кс. Уладзімір Шыдлоўскі і заахвоціў прысутных маліцца ў сваіх інтэнцыях праз заступніцтва святой Тэрэзы.

Постаць святой пастараўся наблізіць вернікам пробашч браслаўскай парафіі кс. Станіслаў Мжыглуд. У гаміліі святар распавёў кароткую гісторыю жыцця гэтай святой. Здавалася б, яе жыццё нічым асаблівым не вылучалася, але яна заўсёды была настойлівай у сваёй веры і служэнні Богу. Так, ужо ў 15-ці гадовым узросце дзяўчына вырашыла ўступіць у кляштар кармелітанак, але біскуп гэтага не дазволіў. Тады іерарх пажартаваў, што трэба прасіць аб дазволе самога Папу Рымскага. Праз невялікі прамежак часу так і сталася: Тэрэза сустрэлася са Святым Айцом падчас агульнай аўдыенцыі ў Рыме і затрымала яго сваёй просьбай. У выніку гэтая зусім маладая дзяўчына праслужыла Богу 9 гадоў жыцця ў кармелітанскім кляштары і ва ўзросце 24-х гадоў памерла ад сухотаў.

«Кожны дзень святая Тэрэза імкнулася праводзіць так, нібы гэта апошні дзень жыцця. У кожным чалавеку яна імкнулася бачыць Хрыста. Няма незвычайных рэчаў, але трэба годна выконваць штодзённыя абавязкі – так казала святая», − падкрэсліў святар.

«Дарагія браты і сёстры! Нам па прыкладзе святой Тэрэзы ад Дзіцятка Езус неабходна таксама штодня задаваць сабе пытанне: ці добраму Богу падабаецца тое, што я раблю, мае думкі і чыны? Ці падабаецца Богу маё жыццё? На гэтае пытанне варта ўжо сёння адказаць у цішыні свайго сэрца» − заахвоціў ксёндз Станіслаў.

Пасля Імшы ксёндз пробашч Уладзімір запрасіў усіх на пачастунак: гарачы суп і гарбату, каб у сямейнай атмасферы пагутарыць адно з адным і з прысутнымі святарамі.


Тэкст і фота Святланы Жылевіч