8 верасня – католікі адзначаюць Дзень нараджэння Марыі. Для нашай парафіі гэта і свята тытула касцёла, а сёлета яшчэ і яго 120-годдзе. Святую Імшу ўвечары ўзначаліў пробашч парафіі ксёндз Станіслаў Мжыглуд.


«Няма большай любові, чым любоў маці, бескарыслівая і адданая − такой думкай распачаў гамілію ксёндз Станіслаў Мжыглуд. – Нашы зямныя маці – гэта вобраз маці Езуса Хрыста. Для Яго маці была галоўным чалавекам у жыцці, хоць, часам, можа так і не здавацца. На вяселлі ў Кане Галілейскай Езус сказаў Марыі рэзкія словы: “ці твая гэта справа?”і звярнуўся да яе словам “жанчына”. Біблісты кажуць, што гэтае слова не паказвае халоднасць адносінаў Езуса, але паказвае годнасць Марыі, яна – новая Ева, якая ратуе чалавецтва. Першы цуд адбыўся па яе просьбе і з таго моманту Марыя заступаецца за нас».

«Сённяшняя ўрачыстасць няхай будзе нагодай усвядоміць сабе, што маем не толькі зямную маці, якая клапоціцца пра нас, але і нябесную, якая тым больш пра нас памятае і ніколі не забудзе, нават калі мы адыйдзем ад Хрыста», − адзначыў святар.

Літургія завершылася ўрачыстай працэсіяй вакол касцёла і літаніяй да Найсвяцейшай Панны Марыі.


Тэкст: Святлана Жылевіч
Фота: Ірына Гайдамовіч