19 жніўня завершыліся святкаванні ўрачыстасці Маці Божай Валадаркі Азёраў. Найбольшую колькасць пілігрымаў і гасцей сабрала Імша а 11-й гадзіне дня. Упершыню наш санктуарый наведаў Апостальскі Нунцый у Беларусі арцыбіскуп Габар Пінтэр, які і ўзначаліў Імшу.

Канцэлебравалі літургію біскуп Віцебскі Алег Буткевіч, дапаможныя біскупы Мінска-Магілёўскай архідыяцэзіі Юрый Касабуцкі і Аляксандр Яшэўскі, дапаможны біскуп Гродзенскай дыяцэзіі Юзаф Станеўскі, Апостальскі візітатар для грэка-католікаў Беларусі архімандрыт Сяргей Гаек, Першы сакратар Апостальскай Нунцыятуры мансеньёр Марынко Антолавіч, часовы Павераны ў справах Апостальскай Нунцыятуры ў Рэспубліцы Чад і наш зямляк з Лучая кс. Аляксандр Рагіня, правінцыяльны Кансультант па місійных справаў айцоў сальватарыянаў кс. Міраслаў Станэк, галоўны рэдактар Беларускай секцыі Ватыканскага радыё кс. Аляксандр Амяльчэня і шматлікія іншыя святары.

Сярод запрошаных гасцей на ўрачыстасць прыбылі старшыня Аддзела па справах рэлігій і нацыянальнасцей Абласнога Выканаўчага Камітэта Міхаіл Даніленка, старшыня Браслаўскага райвыканкама Уладзімір Дранеўскі, старшыня Браслаўскага раённага Савета дэпутатаў Ніна Пучынская, Пасол Рэспублікі Польшча ў РБ Конрад Паўлік, кіраўнік палітыка-эканамічнага аддзела Пасольства Польшчы Міхал Хаброс, кіраўнік Консульскага аддзела Пасольства Польшчы Марэк Пендзіх і Першы сакратар консульства Латвійскай рэспублікі Рыта Пастэрэ.

Ну і канечне, пляц перад палявым алтаром запоўнілі шматлікія мясцовыя вернікі і пілігрымы, якія пешшу, на роварах ці аўто прыехалі на супольную святочную малітву ў наш санктуарый.

У гаміліі арцыбіскуп Габар Пінтэр звярнуў увагу вернікаў на тое месца, дзе Марыі аб’явіўся Анёл і абвесціў ёй аб тым, што стане Маці Божай. Гэта была не святыня, а нікому невядомая мясцовасць, сярод звычайных дамоў. І з таго часу часта месцам сустрэчы з Богам становіцца перэферыя грамадства. Можам і мы ў сваім жыцці запытаць Бога: як станецца гэта? Ці магчыма сёння жыць радасцю Евангелля? «Магчыма, − адзначыў Апостальскі Нунцый. – Але мы павінны быць не проста гледачамі, але і сведкамі Бога».

«Бог і сёння працягвае шукаць сэрцы, як у Марыі, гатовыя верыць і давярацца Богу нават у складаных жыццёвых умовах», − дадаў біскуп.

Сваю пропаведзь іерарх завершыў словамі малітвы-просьбы да Марыі аб радасці для тых, хто яе пазбаўлены: дзеці-сіроты, дзеці, абдзеленыя бацькоўскай любоўю і іншыя.

Пасля літургіі гучалі словы ўдзячнасці ад іерархаў для ўсіх вернікаў, прывітальныя словы ад шаноўных гасцей. Свята завершылася. Але наша Браслаўская матуля надалей чакае нас у санктуарыі, моцна прытуляе і жадае весці нас да Бога.


Тэкст: Святлана Жылевіч
Фота: Ірына Гайдамовіч