Прыгожым майскім днём, напоўненым не толькі цяплом сонечных промняў, але вялікай радасцю і хваляваннем, у нашай парафіі адбылася ўрачыстасць Першай святой Камуніі. 51 дзіця ўпершыню цалкам удзельнічала ў Эўхарыстыі.
 
На працягу двух гадоў дзеткі старанна рыхтаваліся да гэтай падзеі: прыходзілі на катэхэзы, удзельнічалі ў святой нядзельнай Імшы, рэкалекцыях і розных сустрэчах.
 
У сваім казанні ксёндз пробашч Станіслаў падкрэсліў выключную ролю гэтага дня і заахвоціў маленькіх вернікаў быць прыкладам для сваіх бацькоў.  
 
Асаблівым момантам падчас Літургіі было адрачэнне ад зла і вызнанне веры дзеткамі ў прысутнасці бацькоў, хросных, родных і іншых парафіянаў пасля чаго можна было годна прымаць Цела Хрыста ў сваё сэрца.
 
У канцы Эўхарыстыі традыцыйна надышоў момант падзякі. Дзеці спевамі падзякавалі святарам і бацькам, якім падаравалі чырвоныя ружы, як сімвал бязмернай любові і ўдзячнасці, што асабліва расчуліла бацькоў.
 
Бацькі таксама падзякавалі святарам за іх паслугу, цярплівасць і час, прысвечаны кожнаму, законным сёстрам за прыклад і бацькоўскую любоў, а таксама хору, за ўпрыгожванне ўрачыстасці чароўнымі гукамі музыкі і спеву.
 
Пасля ўручэння пасведчанняў і агульнага фотаздымка дзеці выйшлі на вуліцу, дзе падзякаваўшы Богу за дар Першай святой Камуніі, выпусцілі з малітвай ў неба шарыкі.
 
тэкст: Анжаліка Пілат
фота: Ірына Гайдамовіч