20 сакавіка біскуп Віцебскі Алег Буткевіч выдаў дэкрэт “Аб парадку набажэнстваў і душпастырскіх мерапрыемстваў падчас пандэміі каранавірусу”. Прыводзім пункты дакумента, якія датычаць вернікаў.
 
У сувязі з далей трываючай небяспекай распаўсюджвання каранавірусу ардынарый Віцебскай дыяцэзіі пастанаўляе наступнае:
  1. Удзяліць дыспенсу (звальненне - рэд.) ад удзелу ў нядзельных і святочных святых Імшах асобам, якія маюць сімптомы ВРВІ (падвышаная тэмпература, кашаль, галаўны боль г.д.), і асобам якія адчуваюць страх, нярэдка панічны, перад заражэннем.

    Пры гэтым варта памятаць, што дыспенса не з’яўляецца забаронай удзелу ў набажэнстве ці св. Імшы, але звальненнем з абавязку ўдзелу без наступства граху. Разам з тым дыспенса не з’яўляецца звальненнем ад малітвы ўвогуле, наадварот, няхай нашая малітва ў гэтым часе будзе больш інтэнсіўнай і шчырай.

     
  2. Тыя, хто карыстаецца дыспенсай, павінны далучацца да святой Імшы праз сродкі масавай інфармацыі, напр. праз радыётрансляцыю з мінскага архікатэдральнага касцёла Найсвяцейшага Імя Марыі (нядзеля, першая праграма Беларускага радыё, 8.15), а таксама відэатрансляцыю на інтэрнэт-партале Catholic.by (8.15, 10.00, 11.30, 13.00 і 18.30), або ў іншых сродках масавай камунікацыі. Партал Catholic.by прадугледжвае таксама тэлетрансляцыі св. Імшы з мінскай архікатэдры па буднях (7.15, 8.00 і 18.30).

    Пры гэтым ёсць магчымасць прымаць духоўную св. Камунію. (Духоўная Камунія – гэта лучнасць чалавека з Езусам Эўхарыстычным, якая рэалізуецца праз прагненне прыняцця сакрамантальнай Камуніі. Галоўнымі элементамі духоўнай Камуніі з’яўляюцца:
  • моцнае прагненне, якое вынікае з жывой веры;
  • прагненне сакрамэнту Эўхарыстыі, які прыносіць збаўленне;
  • прагненне, якое вынікае з любові да Хрыста;
  • прагненне выразнае і свядомае.
Духоўная Камунія, арыентаваная на сакрамантальную Камунію, вядзе да яе і з ёю цесна злучаная. Плёны духоўнай Камуніі з’яўляюцца па сутнасці тымі самымі, што і ў сакрамантальнай Камуніі (эўхарыстычнай), г.зн. узрастанне асвячальнай ласкі, любові, чыстасці жыцця і еднасці з Хрыстом).
 

3. Пажадана, каб абрад пахавання адбываўся толькі на могілках, пры ўдзеле найбліжэйшай сям’і. Святая Імша за памерлага цэлебруецца ў той самы дзень, або іншы, па дамоўленасці з блізкімі памерлага.

4. Кожны дзень у сем’ях ці асабіста ў гадзіну Божай Міласэрнасці ў 15.00 маліцца тройчы “Ойча наш…”, “Вітай Марыя”, “Хвала Айцу…” + Вяночак да Божай Міласэрнасці, і (або) у 20.30 святы Ружанец, каб супольна ахінуць усю краіну гэтымі традыцыйнымі для нашага народа малітвамі. Калі па важных прычынах прапанаваны час не адпавядае, то можна ўключыцца ў малітву ў любы іншы час (...).
 
Усім няўхільна выконваць загады і распараджэнні службаў аховы здароўя і грамадскага парадку. Пададзеныя ў гэтым Дэкрэце пастановы абавязковыя да іх адмены.
Цалкам з тэкстам дэкрэту можна азнаёміцца тут.