17 лютага ў Каталіцкім Касцёле распачаўся Вялікі пост. У гэты саракадзённы перыяд духоўнай падрыхтоўкі да свята Уваскрасення Пана вернікаў заахвочваюць да асабістага навяртання да Бога. Пра гэта казаў і пробашч нашай парафіі ксёндз Станіслаў Мжыглуд.
«Дарагія браты і сёстры, любоў да Пана Бога павінна быць для нас крыніцай любові да чалавека, — звярнуўся пробашч да прысутных вернікаў. — Касцёл зноў дае нам магчымасць падчас Вялікага посту, які сёння распачынаем, у сабе гэтую любоў да бліжняга абудзіць, каб мы навярталіся. Навяртацца — гэта бачыць Бога ў другім чалавеку. Калі мы рашаемся прыняць гэтую любоў, гэтае духоўнае змаганне з самім сабой і практыкаваць любоў да бліжняга ў нашай штодзённасці, то чакае нас узнагарода. Пан Езус паабяцаў: "Айцец твой, які бачыць патаемнае, аддасць табе"». 
 
Святар нагадаў, што чалавек па сваёй натуры добры, бо з'яўляецца Божым стварэннем. Прычынай злых учынкаў багасловы называюць рэчаіснасць, якой з'яўляецца першародны грэх. Але ў кожным чалавеку спіць Анёл дабрыні. 
 
«Вялікі пост павінен быць часам разважання над самім сабой. Бо заўважце: мы так вельмі лёгка ацэньваем другога чалавека, бачым чужыя слабасці і памылкі. А з сённяшняга дня варта паглядзець на ўласныя грахі і паспрабаваць штосьці змяніць. Папяльцовая серада — гэта вельмі добрая нагода прыгадаць сабе тое, пра што звычайна не хочам: літургія слова нагадваем нам пра навяртанне і пакуту». 
 
Ксёндз Станіслаў адначыў, што не трэба думаць, што ўсе пастановы не маюць сэнсу, бо штогод паўтараецца тое самае. Але што б было з намі, калі б у кожны пост мы не прадпрымалі ўвогуле ніякіх намаганняў змяніць сябе?..
 
«Навяртацца — значыць змагацца са сваім эгаізмам і пыхлівасцю, якая падказвае, што мы дасканалыя і не трэба ў сабе нічога змяняць. Бо гэта няпраўда», — дадаў святар.
 
«Дарагія браты і сёстры! На пачатку Вялікага посту заахвочваю вас і самога сябе, каб мы ў гэты час навяртання (...) памяталі, што ён дадзены нам дзеля таго, каб мы сапраўды нанова ці яшчэ больш даверыліся Міласэрнаму Богу», — завершуў гамілію пробашч парафіі.
 
У гэты дзень падчас святых Імшаў адбыўся абрад пасыпання галоў попелам, які суправаджалі словы святароў «Ты прах і ў прах вернешся» або «Кайцеся і верце ў Евангелле». Гэта знак прызнання сваёй недасканаласці і залежнасці ад Бога.
Запісала Святлана Жылевіч