Папяльцовая серада ў гэтым годзе прыпадае на 17 лютага. У гэты дзень кожны католік мае абавязак удзельнічаць у святой Імшы, якія ў нашай парафіі будуць цэлебравацца ў 11.00 і 19.00.
Папяльцовая серада атрымала сваю назву ад абраду пасыпання галоваў попелам. У літургіі гэты сімвал суправаджаюць словы святара: «Ты прах і ў прах вернешся» або «Кайцеся і верце ў Евангелле». У гэты дзень прадпісана не толькі ўстрыманне ад мяса, але і сціслы пост, які заключаецца ў абмежаванні колькасці спажыванай ежы. Пры такім посным абмежаванні дапускаецца адзін раз паесці дасыта, не забараняецца спажыць невялікую колькасць ежы раніцай і ўвечары. Такі пост з’яўляецца абавязковым для вернікаў з 18 да 60 гадоў. 
 
Час Вялікага посту прысвечаны разважанню мукі, смерці і ўваскрасення Езуса Хрыста. Дапамагаюць у гэтым адмысловыя набажэнствы, уласцівыя для гэтага літургічнага перыяду: Песні жальбы і Крыжовы шлях
 
Песні жальбы ў нашай парафіі спяваюцца кожную нядзелю Вялікага Посту па-польску раніцай а 08.00, па-беларуску - у 10.30.
Крыжовы шлях - у кожную пятніцу Вялікага Посту: раніцай пасля святой Імшы а 11.00 і вечарам у 18.15.
 
Урачыстасць Уваскрасення Хрыста будзем святкаваць 4 красавіка.