Нагадваем пра рэкалекцыі

У пятніцу 16 сакавіка ў нашай парафіі распачаліся велікапосныя рэкалекцыі. Праводзіць іх ксёндз Андрэй Кулік, пробашч парафіі Унебаўшэсця Пана ў Дзеркаўшчыне. Запрашаем усіх парафіянаў далучыцца да гэтых духоўных разважанняў.

У першы дзень рэкалекцый ксёндз Андрэй Кулік нагадаў нашым парафіянам аб неабходнасці пастаяннай працы над сабой. Наша непрыязнь да бліжніх і раздражнёнасць часта з’яўляюцца прычынай унутранага неспакою. Мы самі неідэальныя, як і іншыя людзі. І, як падкрэсліў святар, выйсце заключаецца ў прыняцці сябе і іншых такімі, якімі яны ёсць. Але сябе, у адрозненне ад іншых, мы можам змяніць.

«Рабі тое, што можаш, а астатняе пакінь Богу ў Яго Провідзе (…). Браты і сёстры! Католік не стамляецца ў сваіх рэлігійных практыках, ён ідзе наперад. Калі апусціў рукі, то гэта ўжо апошняе. А ў нас ёсць Божыя цноты: вера, надзея і любоў. Надзея на тое, што Бог мяне не пакідае», ‒ падкрэсліў ксёндз Андрэй.

«Мая непрыязнь да іншага чалавека, мой недахоп любові і цяжкасці ў гэтай любові і ў прабачэнні ўзнікаюць таму, што мы ставім вялікія прэтэнзія іншым і малыя патрабаванні да сябе», ‒ дадаў рэкалекцыяніст.

Увечары нашу парафію наведаў біскуп Віцебскі Алег Буткевіч, які ўдзельнічаў у набажэнстве Крыжовага шляху, а пасля ўзначаліў святую Імшу. Іерарх пажадаў парафіянам багатых духоўных плёнаў ад перажывання рэкалекцый.

Святлана Жылевіч