Нашы маладыя парафіяне годна выступілі на фестывалі каляднай песні ў Мёрах

5 студзеня ў Мёрах прайшоў XV юбілейны фестываль каляднай песні «Зорка Бэтлеему».

У гэтым годзе сваімі выступленнямі парадавалі вернікі з Дзеркаўшчыны, Паставаў, Варапаева, Браслава, Глыбокага, Шаркаўшчыны, Наваполацка, Віцебска, Мёраў і ўпершыню прынялі ўдзел прадстаўнікі з парафій ў Асвеі і Дуброўне. Нашу парафію прадставілі моладзевы гурт «Alis Angeli» і трыа «Зорачкі».

Арганізатарам гэтага штогадовага конкурсу, які дае магчымасць дзецям і моладзі праяўляць свае таленты і такім чынам праслаўляць нованароджанага Збаўцу, з’яўляецца кс. Кшыштаф Мянкіна, пробашч парафіі ў Мёрах. Спецыяльнымі гасцямі фестывалю сталі біскуп Алег Буткевіч, генеральны вікарый кс. Францішак Кісель і лаўрэат прэміі прэзідэнта «За духоўнае адраджэнне» кс. Чэслаў Курэчка МІС.

Вядома, самай эмацыйнай часткай праграмы было ўручэнне дыпломаў і аб’яўленне вынікаў. Журы ацэньвала ўдзельнікаў у некалькіх намінацыях. Так у катэгорыі «Вакальныя гурты» дыплом 1 ступені атрымала наша трыа «Зорачкі» (Піртань Яна, Пілат Эліна, Нужына Крысціна). У намінацыі «Вакальна-інструментальны гурт» наш гурт «ALIS ANGELI» («Крылы анёлаў») заняў 2 месца. Удзельнікі гурта: Мацеша Уладзіслаў, Буко Ян, Кажаронак Яўген, Піртань Антон, Храпан Міхаіл і Дзіковіч Аляксей.

Шчыра дзякуем дзяўчынкам і юнакам за іх таленты і смеласць, а іх бацькам і арганістцы Іне Сапун за дапамогу ў падрыхтоўцы выступленняў.

Тэкст: Святлана Жылевіч
паводле інфармацыі catholicnews.by

фота: Алег Альхімовіч