Вось і надышоў прыгожы час, калі нашыя сэрцы зноў жадаюць прыйсця Езуса у нашыя жыццёвыя прыгоды, у нашыя сем’і, у нашу штодзённасць. Цяпер, асабліва можам запрашаць Езуса у кожную справу: “Прыйдзі, Пане Езу!”
 
Час адвэнту – час перамены, аднаўлення, час духовага ўзбагачэння і напаўнення Божай ласкай. Як Св. Марыя – напоўненая Божай прыгажосцю, так і мы наслядуючы Яе пакору і адданасць Божай волі, можам быць прыгожымі, трываць у Божым святле.
 
Наша парафія распачала гэты час прыгажосці і святла. Як кажуць: “Хто рана ўстае, таму Бог дае!” Вось і нашыя самыя маленькія парафіяне цешацца агеньчыкамі сваіх ліхтарыкаў, рыхтуюць сэрцы на Рараты, выцягваюць зорачкі з заданнем і збіраюць часткі пазлаў на Божае Нараджэнне. Вядома, што радасць дзетак залежыць ад бацькоў і дарослых. Удзел у Раратніх Імшах агарняе ўсю сям’ю, каб рана ўстаць, сабрацца і да Касцёла дабрацца. Гэта не так лёгка, але вельмі карыстна ў самавыхаванні і духовым адраджэнні. Гэты час пакідае шмат цёплых успамінаў, якія хаваюцца у свове РАЗАМ. Разам з бацькамі, разам з бабулей, разам з хроснымі, з сябрамі, з суседзямі… Разам узбагачаемся і напаўняем жыццё Божым святлом.
 
Дзякуем сем’ям, дзякуем дарослым за прыклад веры і заахвочваем усіх парафіянаў. Няхай усе дзеці, моладзь і старэйшыя маюць магчымасць быць разам і трываць у Божай Прысутнасці. Бог чакае кожнага… Бог прагне нас напоўніць САБОЙ… Бог жадае благаславіць нашу штодзённасць!
 
Мараната!
Прыйдзі, Езу, у нашыя сем'і, каб панаваў у іх дух прабачэння і адзінства.
Прыйдзі, Езу, у нашыя адносіныз блізкімі, у словы і ўчынкі, каб Твой супакой намі панаваў.
Прыйдзі, Езу, у нашыя пачуцці, эмоцыі і перажыванні, каб Твая мудрасць намі кіравала.
Прыйдзі, Езу,у нашыя духоўныя раны, слабасці і залежнасці, каб Твая моц нас аздараўляла.
Прыйдзі, Езу, у нашыя сэрцы, каб Твая любоў нас сагравала і ажыўляла.
Прыйдзі, Езу, у нашыя жаданні, мары і надзеі, каб Твая Прысутнасць ва ўсім нам дапамагала.
Прыйдзі, Езу, у сучасныя падзеі нашага жыцця, каб Тваё святло нашыя шляхі асвятляла.
Прыйдзі, Езу, будзь з намі цяпер і ў кожны дзень...