Рараты — адмысловыя святыя Імшы ў перыяд Адвэнту. Назва «Рараты» бярэ свой пачатак ад лацінскай песні «Rorate coeli desuper» («Дайце, нябёсы, росы з вышыняў»), якая спяваецца ў перыяд Адвэнту, звычайна на пачатку раратняй Імшы. 

Удзел у такіх набажэнствах – гэта заахвочванне прысвяціць адносінам з Богам больш часу, зрабіць іх больш якаснымі і шчырымі. 

Традыцыйна Рараты адбываюцца перад усходам сонца. У касцёле пагашана святло, толькі гараць раратнія ліхтарыкі, якія прыносяць з сабою людзі, звычайна запаленымі, ідучы з дому ў святыню, асвятляючы змрок. Гэтая прыгожая сімволіка нагадвае нам пра неабходнасць збірання на працягу ўсяго Адвэнту добрых учынкаў, якія дапамогуць асвяціць змрок граху ў нашай душы, паказаць Езусу шлях да нашага сэрца.

Традыцыя ранішніх раратніх Імшаў існавала ў нашай парафіі здаўна. Але з цягам часу святары вырашылі праводзіць іх вечарам, каб удзельнічаць у іх маглі як мага больш дзяцей. Сёлета пробашч парафіі прапанаваў дзецям і іх бацькам зрабіць большы высілак і акрамя два разы ўвечар (панядзелак і серада) прыйсці яшчэ і ў пятніцу раніцай. Як заўсёды святары і сёстры-эўхарысткі дапамагаюць дзецям з карысцю правесці перыяд Адвэнту, накіроўваюць іх. Так кожныя Рараты дзеці атрымліваюць адно заданне, а разам з тым прыносяць спісы сваіх добрых учынкаў. 

Рараты – гэта адна з магчымасцяў якасна перажыць час Адвэнту. У парафіі нас яшчэ чакаюць рэкалекцыі, але варта памятаць і пра асабістыя намеры на гэты перыяд. Каб з кожным днём станавіцца ўсё лепш.

Тэкст: Святлана Жылевіч

Фота: Ірына Гайдамовіч