Маці Божая Браслаўская! Валадарка Азёраў і ўсіх нашых сэрцаў. Звяртаемся да Цябе з вялікім даверам і глыбокай пашанай, бо Ты нарадзіла Збаўцу свету – Езуса Хрыста і зараз трымаеш Яго на сваіх руках.
Прытулі так і кожнага з нас, асабліва тады, калі будзем адчуваць сябе бездапаможнымі і самотнымі.
Дзякуем Табе, што з даўніх часоў збіраеш ля свайго падножжа і аб’ядноўваеш вакол алтара Твайго Сына ўсіх хрысціянаў. Навучы і нас жыць у любові і згодзе з усімі людзьмі.
Апякуйся ўсімі сем’ямі і будзь прыкладам адданага мацярынства і вучы выхоўваць дзяцей, каб яны сталі добрымі і адказнымі людзьмі.
Выпрасі нам ласку ў Твайго Сына, каб мы ніколі не сышлі з дарогі праўды і Божых загадаў, якая вядзе да сапраўднай мэты збаўлення.
Марыя! Праз Цябе і ў Табе Бог да нас прамаўляе. Адкрый нашыя сэрцы на Слова Божае і Яго святую волю. Амэн.
Акт аддання Віцебскай дыяцэзіі Маці Божай Валарцы Азёраў
О Марыя, Маці Браслаўская! Мы, Твае дзеці, хочам аддаць Табе ва ўласнасць нашыя сэрцы, нашу працу і адпачынак, малітвы і надзеі, каб Ты, нашая Маці, магла распараджацца імі, як сваёй праўдзівай уласнасцю.
Пад Тваёй апекай і кіраўніцтвам мы хочам выконваць усё, што ў нашых сілах, каб на нашай зямлі было Валадарства Хрыста. Мы жадаем, каб Хрыстус пасяліўся ў нашых сэрцах, нашых сем’ях, парафіях, ва ўсёй краіне.
Просім Цябе, о Маці Браслаўская, ахоўвай нас ад няшчасцяў. Дапамажы, каб сужэнствы нашы былі святыя, каб не было ў нас нянавісці, а толькі братняя любоў, каб моладзь наша гарнулася да Бога, а дзеці нашы былі нявіннымі.
О Марыя, наша Валадарка, дай ласку святасці для нашых маці, а для нашых бацькаў — ласку трывання ў веры. Дай нам святых пастыраў. Атуляй апекай тых, хто імкнецца ісці за Божым заклікам.
Захавай Святога Айца Бэнэдыкта XVI, дапамажы, каб усе мы сталі ўласнасцю Тваёй і Твайго Сына, нашага Пана Езуса Хрыста. Амэн.
Мы – дзеці Твае,
Найсвяцейшая Панна Марыя.
Наш Браслаўскі край
Сваім Матчыным вокам акінь.
Мы просім Цябе
Да збаўлення дарогу адкрый нам
Вытокам новай чысціні.
Над сінім прасторам
Хай ясна Твой воблік іскрыцца,
Нас ад чорнай бяды барані.
Мы грэшныя ўсе,
Заслужылі на гнеў Твайго Сына.
І што нам рабіць –
На каленях стаім прад Табой,
Ахвяру нясём,
І да Маці ўзываем адзінай:
Меч Боскі адкінь,
Падары нам душэўны спакой.
Мы – дзеці Твае,
Найсвяцейшая Панна Марыя,
Наш Браслаўскі край
Сваім Матчыным вокам акінь.
Мы просім Цябе
Да збаўлення дарогу адкрый нам,
Вядзі ў вечны рай,
У пакутах зямных не пакінь.
Т.Крумплеўская
Запрашаем на біблейскія сустрэчы