Кароны Сыну і Маці

У жніўні 2009 года ў Браславе адбудзецца незвычайная падзея – каранаванне папскімі каронамі абраза Маці Божай Валадаркі азёраў. Такім чынам на Віцебшчыне з’явіцца першы каранаваны абраз. На Беларусі каралеўскую годнасць раней атрымалі Маці Божая Берасцейская (1996), Маці Божая Будслаўская (1998), Марыя Беззаганна Зачатая (Мінск) (2005), Маці Божая Кангрэгацкая ў Гродне (2005) і Маці Божая Гудагайская (Гродзенская вобласць) (2007).

У чым сэнс каранавання і чаму менавіта на Браслаўскую Валадарку азёраў будуць ускладзены каштоўныя кароны? Браслаўская Валадарка цалкам вартая такога гонару, бо з’яўляецца цудадзейнай і шанаваўнай святыняй усяго сінявокага краю. “У чым сэнс каранацыі? Насамрэч, гэта натуральнае пытанне, бо ў Марыі, як бачыце, ужо ёсць карона. Але цяпер яна будзе каранавацца папскімі каронамі. Гэта - афіцыйнае пацверджанне і прызнанне паўсюдным Касцёлам таго факту, што Браслаў з’яўляецца цэнтральным месцам шанавання Марыі, марыйнага культу на Віцебшчыне. Такім чынам, гэтая карона не звычайная аздоба, а найперш – сімвалам вялікай пашаны”.

Дарэчы, найпершым у свеце абразом, каранаваным папскімі каронамі, была Маці Божая ў сакрыстыі (рызніцы) базілікі святога Пятра ў Рыме (1631).

фота: Бласлаўленне Святым Айцом Бенедыктам XVI кароны. Кароны прадставілі Ксендз Генерал Анджэй Урбанскі SDS і Дэрыктар Рэферату Замежных Місій Сальватарыянаў Ксендз Антоні Земба SDS, у Ватыкане 2009